काठमाडौं — बालगायक अशोक दर्जी अभिनीत चलचित्र ‘मन बिनाको धन’ आगामी कार्तिक २१ गतेदेखि देशव्यापी रूपमा प्रदर्शनमा आउँदैछ। निर्देशक तथा संगीतकार टंक बुढाथोकीको कथा, संगीत र निर्देशनमा बनेको यो चलचित्रले मन र धनबीचको सम्बन्धलाई भावनात्मक रूपमा प्रस्तुत गर्ने उद्देश्य राखेको छ।
सार्वजनिक गरिएको ट्रेलरमा समाजमा पैसाको प्रभाव, मानवीय संवेदना र पारिवारिक सम्बन्धका विविध आयाम चित्रण गरिएको देखिन्छ। फिल्मले ‘धनभन्दा मन ठूलो हो’ भन्ने सन्देश दिन खोजेको निर्देशक बुढाथोकीले बताएका छन्।
चलचित्रमा अशोक दर्जी, आर बुढाथोकी, नीता ढुंगाना, रमेश विश्वकर्मा, सरोज खनाल, भोलाराज सापकोटा, सन्तोष पन्त, रबिन्द्र झा, बुद्धि तामाङ, बिनु राउत, रमेश बुढाथोकी, पार्वती अधिकारी लगायतका कलाकारको अभिनय रहेको छ। बाल कलाकारका रूपमा सम्रागी थापा, बाबु पराजुली, दीपजल बस्नेत, आरिका झा, अभिषेक थापा लगायत देखिएका छन्।
फिल्मका संवाद शिवम अधिकारी र टंक बुढाथोकीले लेखेका हुन्। छायांकन सौरभ लामा, सम्पादन मित्र डी. गुरुङ, र पृष्ठभूमि संगीत त्सुजिल कर्माचार्यले गरेका छन्।
चलचित्रकी कार्यकारी निर्मात्री मिनु शर्मा ‘सपना’ महिला उद्यमीका रूपमा पनि परिचित छिन्। नेपाल, दुबई, भारत र चीनमा समेत व्यवसाय विस्तार गरेकी शर्माले पहिलोपटक चलचित्र निर्माणमा हात हालेकी हुन्।
ट्रेलर सार्वजनिक भएलगत्तै उनका सुपुत्री सम्रागी थापाको अभिनयले दर्शकको ध्यान तानेको छ। उनको सहज र भावनात्मक अभिनय क्षमताको चौतर्फी चर्चा भइरहेको छ।
निर्मात्री शर्माले यो चलचित्रप्रति आफू अत्यन्त आशावादी रहेको बताएकी छन्। उनका अनुसार चलचित्रले मनोरञ्जनसँगै समाजमा सकारात्मक सन्देश दिनेछ। सफल व्यवसायिक पृष्ठभूमि भएकी उनले चलचित्र क्षेत्रमै पनि सशक्त उपस्थिति जनाउने विश्वास व्यक्त गरेकी छन्। निर्माण बिष्णुमाया मैनालीले गरेकी हुन्।
फिल्ममा कबिराज गहतराज, रामजी लामिछाने र सिस्टर खतिवडाको कोरियोग्राफी रहेको छ भने शाहिल खानले ट्रेलर सम्पादन गरेका हुन्।
ट्रेलर सार्वजनिक भएको केही दिनभित्रै दर्शक तथा फिल्मकर्मीबाट सकारात्मक प्रतिक्रिया प्राप्त भएको निर्माण पक्षले जनाएको छ। निर्देशक बुढाथोकीका अनुसार फिल्मले पारिवारिक र सामाजिक सन्देशसहित मनोरञ्जन दिन सक्नेछ।
फिल्म ‘मन बिनाको धन’ नेपालका हलहरूसँगै विदेशमा पनि प्रदर्शनको तयारी गरिएको निर्माण टिमले जनाएको छ।
