काठमाडौं । गायकद्वय यम बराल र विश्व नेपालीको स्वरमा रहेको गीत ‘साथी’ को भिडियो सार्वजनिक गरिएको छ । बुधवार काठमाडौँमा पत्रकार सम्मेलनको आयोजना गरी सार्वजनिक गरिएको यस गीतमा किरण के उप्रेतीको शब्द, पुष्कर सुनुवारको एरेन्ज र सङ्गीत, विप्लव अधिकारीको रेकर्ड र मिक्सिङ छ ।
गीतको भिडियोमा सन्जीत भण्डारी र मेग सुवेदीको अभिनय रहेको छ । भिडियोमा बाल्यकालदेखि वयस्क अवस्थाका साथीको कथालाई प्रस्तुत गरिएको छ ।
कुवेर तामाङको निर्देशन रहेको भिडियोमा मेग सुवेदीको कन्सेप्ट, बुद्ध थापा एन्ड टिमको छायाङ्कन, विवेक सुनारको सम्पादन, श्याम कुँवरको कलर, उत्सव पौडेलको स्किृप्ट, मोहन सुनुवार(नवीन)को सहायक निर्देशन, निर्मल न्यौपानेको प्रोडक्सन डिजाइन छ ।
सेजल एन्ड सिस्टरको प्रस्तुतिमा निर्माण भएको भिडियो सेजल एन्ड सिस्टर युट्युब च्यानलबाट सार्वजनिक गरिएको छ ।
कार्यक्रममा गायक यम बरालले गीतको शब्दले आफूलाई तानेकाले गीतमा सहकार्य गर्न राजी भएको खुलाए ।
केही चलचित्रमा समेत काम गरिसकेका अभिनेता सन्जीत भण्डारीले साथी आम दर्शकका लागि फरक स्वाद हुने बताए । उनले अभिनय गरेको चलचित्रमा ‘चिठ्ठी’ आगामी जेठमा रिलिज हुँदैछ । विभिन्न चलचित्रमा सशक्त अभिनय कौशल देखाईसकेका भण्डारी म्यूजिक भिडियोमा समेत व्यस्त देखिन्छन ।
भिडियोका मोडल मेगले गीतले आत्मीय साथीको सम्बन्धलाई प्रस्तुत गर्ने भएकाले गीतले आम दर्शकको भावनालाई प्रतिनिधित्व गर्ने बताए । मेगले पहिलो पटक अभिनय गरेका हुन् ।
समाजसेवीको रुपमा ख्याती कमाएका मेग लामो समयदेखि अमेरिकामा रहेर विभिन्न व्यबसायमा संलग्न छन । पछिल्लो पटक समाजसेवीको रुपमा नेपालमा परिचित सुवेदीले हालै जाजरकोट भुकम्पमा करिव २५ लाख भन्दा वढि सहयोग गरेका थिए । भने नेपालमा भईरहने विपदका समयमा उनको सहयोग अतुलनीय हुदै आएको छ ।
आफ्ना दुई छोरी सिजल र सिस्टरको नाउमा संस्था खोली विभिन्न सामाजिक कार्य गर्दै आएका सुवेदी पूर्वी झापा र मोरङ्गका शिविरहरुमा समाजसेवीका रुपमा निकै लोकप्रिय छन । वार्षिक रुपमा करोडौ रुपमा दुखी गरिवका लागि छुट्याउदै आएका सुवेदी नेपालमा समेत व्यबसाय विस्तारको प्रक्रियामा रहेका छन ।
