काठमाडौं । प्राकृतिक विपत्तिले निम्त्याएको पीडा, मानवीय क्षति र विस्थापनको कथा समेटिएको गायक तथा संगीतकार चेतन राईको नयाँ गीत ‘बाढी आयो पहिरो आयो’ सार्वजनिक भएको छ।
१० भदौमा नेपालका विभिन्न स्थानमा आएको विनाशकारी बाढी तथा पहिरोमा परी ज्यान गुमाएका नागरिकहरू प्रति श्रद्धाञ्जली अर्पण गर्दै र विपत्तिबाट प्रभावितहरूको शीघ्र स्वास्थ्यलाभको कामना सहित गीत सार्वजनिक गरिएको हो।
प्राकृतिक विपत्तिपछि सिर्जिएको मानवीय संकट, घरबास गुमाएका परिवारको पीडा, विस्थापन र जनजीवनमा परेको असरलाई गीतले भावनात्मक रूपमा प्रस्तुत गरेको छ। विपत्तिले दिएको पीडालाई मात्र चित्रण नगरी गीतले कठिन परिस्थितिमा पनि आशा, साहस, आपसी सहयोग र एकताको भावना कायम राख्नुपर्ने सन्देश दिएको छ।
गीतमार्फत विपत्तिको समयमा हरेस नखाई एकजुट भएर अघि बढ्न तथा समस्यामा परेका नागरिकलाई सहयोग गर्नसमेत आह्वान गरिएको छ। दुःख र निराशाबीच पनि पुनःउत्थान सम्भव छ भन्ने सकारात्मक भाव गीतको मुख्य सन्देशका रूपमा प्रस्तुत गरिएको छ।
गीतको भिडियोमा बाढी तथा पहिरोबाट भएको विनाशका हृदयविदारक दृश्यहरू समेटिएका छन्। साथै, विपत्तिको समयमा उद्धार तथा राहत कार्यमा खटिएका साहसिक प्रयासका दृश्यहरूलाई पनि भिडियोमा समावेश गरिएको छ।
भिडियोमा स्वयं गायक चेतन राईको अभिनय रहेको छ। विभिन्न प्राकृतिक स्थल, मन्दिर तथा झोलुङ्गे पुललगायतका स्थानमा राईलाई गीतको भावअनुसार अभिनय गर्दै गरेको देख्न सकिन्छ।
‘बाढी आयो पहिरो आयो’ का शब्द, संगीत र स्वर चेतन राईकै रहेको छ भने गीतको एरेन्ज सबिर कार्कीले गरेका हुन्।
