काठमाडौं । दक्ष इन्टरनेशनलको आयोजनामा राजधानी काठमाडौंमा सम्पन्न ‘ग्लोबल स्टार अवार्ड–२०२६’ को दोस्रो संस्करणमा नेपाली सांगीतिक क्षेत्रमा लामो समयदेखि सक्रिय रहँदै आउनुभएका लोकप्रिय गायक तथा संगीतकार रमेश पाठक लाई “ग्लोबल स्टार प्रेरणादायी गायन सम्मान–२०२६” द्वारा सम्मानित गरिएको छ ।
विगत लामो समयदेखि नेपाली गीत–संगीत क्षेत्रमा निरन्तर योगदान दिँदै आउनुभएका रमेश पाठक लाई संगीतमार्फत समाजमा सकारात्मक सन्देश प्रवाह गर्दै नयाँ प्रतिभालाई प्रोत्साहन गर्न उल्लेखनीय भूमिका निर्वाह गर्नु भएकोमा उक्त सम्मान प्रदान गरिएको आयोजकले जनाएको छ । । कार्यक्रममा कला, संगीत, पत्रकारिता, समाजसेवा, शिक्षा तथा स्वास्थ्य क्षेत्रमा योगदान पुर्याउने विभिन्न व्यक्तित्वहरूलाई समेत सम्मान गरिएको थियो ।
समारोहमा वरिष्ठ अभिनेता नीर शाह प्रमुख अतिथिका रूपमा तथा हास्यव्यंग्य कलाकार मदनकृष्ण श्रेष्ठ विशिष्ट अतिथिका रूपमा सहभागी हुनुभएको थियो । कार्यक्रममा वरिष्ठ अभिनेत्री बसुन्धरा भुसाल लाई ‘दिग्गज अभिनेत्री सम्मान’ तथा वरिष्ठ लोकगायक एवं पत्रकार रामप्रसाद खनाल लाई ‘अति विशिष्ट सम्मान’ अर्पण गरिएको थियो । त्यसैगरी अभिनेता तथा मोडल पल शाह, मोडल उषा उप्रेती, गायक यम बराल, निर्देशक देवेन्द्र पाण्डे लगायत विभिन्न बिधाका चर्चित व्यक्तित्वहरूलाई “ग्लोबल स्टार अवार्ड–२०२६” प्रदान गरिएको थियो ।
कार्यक्रममा पूर्व उपसभामुख एवं प्रतिनिधिसभा सदस्य माननीय इन्दिरा राना मगर, पूर्वसचिव भीम उपाध्याय, गायक आनन्द कार्की, गायिका देविका बन्दना लगायत विभिन्न क्षेत्रका विशिष्ट व्यक्तित्वहरूको उपस्थिति रहेको थियो ।
आयोजक संस्थाका अध्यक्ष टेकराज पाण्डेले स्रष्टा तथा विभिन्न क्षेत्रका व्यक्तित्वहरूको योगदानलाई उजागर गर्नु अवार्ड कार्यक्रमको मुख्य उद्देश्य रहेको बताउनुभयो । कार्यक्रममा विविध सांगीतिक तथा सांस्कृतिक प्रस्तुति समेत प्रस्तुत गरिएको थियो ।
