काठमाडौं : चलचित्र विकास बोर्डले आफ्नो १९औं वार्षिक उत्सवको अवसर पारेर असार २७ गते राष्ट्रपति भवनमा ‘राष्ट्रिय चलचित्र पुरस्कार तथा दीर्घ साधना सम्मान’ समारोह आयोजना गर्ने भएको छ।
हरेक वर्ष आयोजना हुने राष्ट्रिय चलचित्र पुरस्कार समारोह २०७४ र ०७५ मा भएको थिएन। यसपटक २०७३, २०७४ र २०७५ गरी तीन वर्षको राष्ट्रिय चलचित्र पुरस्कार तथा दीर्घ साधना सम्मान प्रदान गरिने भएको छ। तीन वर्षकै नेपाली चलचित्र हेरेर निर्णायकले बोर्डमा परिणाम बुझाइसकेका छन्।
राष्ट्रपति विधादेवी भण्डारीको हातबाट प्रदान हुने यो पुरस्कारमा यसपटक सम्मानपत्र र अवार्डसँगै नगदराशी पुरस्कारको पनि व्यवस्था गरिएको छ। २०७३, ०७४ र ०७५ सालमा यो पुरस्कारबाट पुरस्कृत हुनेलाई प्रति विधामा जनही २५ हजार रुपैयाँ समेत प्रदान गरिने चलचित्र विकास बोर्डका अध्यक्ष केशव भट्टराईले जानकारी दिए। समारोहमा तीन वर्षकै दीर्घ साधना सम्मान पनि प्रदान गरिने भएको छ।
अर्को वर्षबाट यो पुरस्कारको राशी बढाएर प्रति विधा ५१ हजार रुपैयाँ प्रदान गरिने निर्णय पनि चलचित्र विकास बोर्डको बैठकबाट पारित भएको छ।
राष्ट्रिय चलचित्र पुरस्कार समारोहलाई चलचित्रमय बनाउन अग्रजदेखि नयाँ पुस्तासम्मका विभिन्न नायक नायिकाले करिब १२ मिनटको नृत्य प्रस्तुत गर्ने भएका छन्। पहिलो चलचित्र आमादेखि अहिलेसम्मका चलचित्रका चर्चित एवम् कालजायी गीतमा कलाकारले पुरस्कार समारोहमा नृत्य प्रस्तुत गर्नेछन्।
वसन्त श्रेष्ठ, राजु शाह र कविराज गहतराजले अहिले विभिन्न गीतमा नृत्य प्रशिक्षण दिइरहेका छन्। यसपटक पुरस्कार समारोहमा नृत्य प्रस्तुत गर्न सरोज खनाल, गौरी मल्ल, सनी रौनियार, रमेश उप्रेती, दिपील रायमाझी, दीपकराज गिरी, दीपा श्री निरौला, जितु नेपाल, रेजिना उप्रेती, नृत्य प्रशिक्षणमा व्यस्त हुनुहुन्छ।
यस्तै समकालीन पुस्ताका अभिनेता अभिनेत्री केदार घिमिरे, पुष्प खड्का, नीता ढुंगाना, पवित्रा आचार्य, बिमला केसी, छुल्ठिम गुरुङलगायतले नृत्य गर्नेछन्।
